ඉරානයට එල්ල කළ ප්‍රහාරය හෙළා දකිමින්, අන්තරේ, දකුණු ආසියානු ශිෂ්‍ය සංගම් සමග එක්වෙයි

ඉරාන ප්‍රහාරය “යුද අපරාධයක්” ලෙස හඳුන්වමින්, අන්තරේ ඇතුළු කලාපීය ශිෂ්‍ය සංගම් 22ක් ඒකාබද්ධ ප්‍රකාශයක් නිකුත් කරයි.

ස්වෛරී රාජ්‍යයක් වන ඉරානයට එරෙහිව එක්සත් ජනපදය සහ ඊශ්‍රායලය විසින් දියත් කර ඇති බව කියන හමුදා ප්‍රහාරය “මහා යුද අපරාධයක්” ලෙස හඳුන්වමින්, ශ්‍රී ලංකාවේ අන්තර් විශ්වවිද්‍යාලයීය ශිෂ්‍ය බලමණ්ඩලය (IUSF) සහ අන්තර් විශ්වවිද්‍යාලයීය භික්ෂු බලමණ්ඩලය (IUBF) ඇතුළු දකුණු ආසියානු ශිෂ්‍ය සංවිධාන 22ක් ඒකාබද්ධ ප්‍රකාශයක් නිකුත් කර තිබෙනවා.

මෙම ප්‍රකාශය මගින් ඔවුන් ඉරානයේ උත්තරීතර නායක අයතුල්ලා අලි කමේනි ඝාතනය කිරීම සහ බාලිකා විදුහලකට බෝම්බ හෙලීමෙන් ළමුන් 160කට අධික පිරිසක් මියයාම දැඩි ලෙස හෙළා දකින බව සඳහන් කරනවා.

“අධිරාජ්‍යවාදී ආක්‍රමණයක්”

මෙම ඒකාබද්ධ ප්‍රකාශයට අනුව, මෙම ප්‍රහාරය “ලේ සහ ගින්දර හරහා මැදපෙරදිග පාලනය තහවුරු කර ගැනීමේ අධිරාජ්‍යවාදී ආක්‍රමණයේ රුදුරු මුහුණුවර” ලෙසයි ඔවුන් විසින් හඳුන්වා දී ඇත්තේ. පලස්තීන වැසියන්ට එරෙහිව ක්‍රියාත්මක වූ විනාශකාරී යන්ත්‍රණයම දැන් ඉරානය දෙසට හැරී ඇති බවට එම සංවිධාන චෝදනා කරනවා.

එක්සත් ජනපදය ඕනෑම රටක් ඕනෑම අවස්ථාවක ආක්‍රමණය කිරීමේ හැකියාව ප්‍රකාශ කර ඇති බවත්, වෙනිසියුලාව ඊට උදාහරණයක් බවත් මෙම ප්‍රකාශයේ වැඩිදුරටත් දැක්වෙනවා.

“අභ්‍යන්තර දේශපාලනය ජනතාවට භාර දෙන්න”

ඉරාන ජනතාව තම රටේ ඒකාධිපති පාලනයට එරෙහිව අරගල කරමින් සිටි බව පිළිගන්නා මෙම ශිෂ්‍ය සංවිධාන, රටක අභ්‍යන්තර දේශපාලනය තීරණය කිරීමේ අයිතිය එම රටේ ජනතාවටම පැවතිය යුතු බව අවධාරණය කරනවා. “ජනතාව නිදහස් කිරීමේ නාමයෙන් කිසිදු ස්වෛරී රටක් ආක්‍රමණය කළ නොහැකි” බවත්, දේශීය ඒකාධිපතියෙකුගේ මර්දනයට විසඳුම විදේශීය මැදිහත්වීම් නොවන බවත් ඔවුන් පෙන්වා දෙනවා.

ඇමරිකානු හිටපු ජනාධිපති ඩොනල්ඩ් ට්‍රම්ප් විසින් ඉරානය ‘නිදහස් කරන’ බවට කළ ප්‍රකාශය හුදෙක් අධිරාජ්‍යවාදී ක්‍රියාවක් ලෙස මෙම ශිෂ්‍ය එකමුතුව විසින් හෙළා දැක තිබෙනවා.

ගෝලීය සහයෝගීතාවයට අමතන්න

මෙම ඇමරිකානු-ඊශ්‍රායල ආක්‍රමණයට එරෙහිව සහ ඉරාන ජනතාව සමඟ සහයෝගීතාවයෙන් නැගී සිටින ලෙස ලොව පුරා සිටින සිසුන්, තරුණයින් සහ ප්‍රගතිශීලී බලවේගයන්ගෙන් මෙම සංවිධාන එකමුතුව ඉල්ලා සිටිනවා. “අධිරාජ්‍යවාදය පරදවමු! සමාජවාදය දිනේවා!” යන සටන් පාඨයද ඔවුන්ගේ ප්‍රකාශයට ඇතුළත් ය.

මෙම ඒකාබද්ධ ප්‍රකාශයට අත්සන් තැබූ සංවිධාන,

* බංග්ලාදේශය – BCF, BSU, DSC, RSU, RS-YM, SSF (සංවිධාන දෙකක්)

* ඉන්දියාව – AIDSO, AISA, AISB, AISF, PSU

* නේපාලය – ANNISU(R), ANNFSU(S), ANSU, ANSU(S), SSSUN

* පකිස්ථානය – DSF, NSF

* ශ්‍රී ලංකාව – IUBF (අන්තර් විශ්වවිද්‍යාලයීය භික්ෂු බලමණ්ඩලය), IUSF (අන්තර් විශ්වවිද්‍යාලයීය ශිෂ්‍ය බලමණ්ඩලය), RSU

මෙම ප්‍රකාශය දකුණු ආසියාවේ ප්‍රධාන පෙළේ වාමවාදී සහ ප්‍රගතිශීලී ශිෂ්‍ය ව්‍යාපාරවල පොදු ස්ථාවරය නියෝජනය කරනවා.