මැදපෙරදිග යුද තත්ත්වය වහා පාලනයට කැපවන ලෙස ජනපති අනුර කුමාර දිසානායක පාර්ලිමේන්තුවේදී සියලු පාර්ශ්වයන්ගෙන් ඉල්ලයි.
මැදපෙරදිග කලාපයේ උත්සන්න වී ඇති යුදමය තත්ත්වය වහාම පාලනය කිරීම සඳහා, ඊට සම්බන්ධ සියලු පාර්ශ්වයන් සාමකාමී විසඳුමක් වෙනුවෙන් කැපවිය යුතු බව ජනාධිපති අනුර කුමාර දිසානායක අවධාරණය කරයි. අද (03) දින පාර්ලිමේන්තුව අමතමින්, මැදපෙරදිග අර්බුදය සම්බන්ධයෙන් ශ්රී ලංකා රජයේ නිල ස්ථාවරය ප්රකාශයට පත් කරමින් ජනාධිපතිවරයා මේ බව පැවසීය.
යුද්ධය කිසිවෙකුටත් විසඳුමක් නොවේ
ඕනෑම යුද ගැටුමක්, එයට සම්බන්ධ කිසිදු ජන කොටසකට යහපතක් අත්කර නොදෙන බව පෙන්වා දුන් ජනාධිපතිවරයා, වර්තමාන ලෝකයේ පවතින දියුණු යුද තාක්ෂණය හේතුවෙන් ගැටුමක ප්රතිඵල ඉතා විනාශකාරී විය හැකි බවට අනතුරු ඇඟවීය.
“ඕනෑම යුද ගැටුමක් කිසිදු ජන කණ්ඩායමයකට හිතකර තත්ත්වයක් නිර්මාණය කරන්නේ නෑ. තාක්ෂණික වශයෙන්, යුදමය වශයෙන් ඉතාම විශාල අවි තාක්ෂණික මෙවලම් නිර්මාණය කරමින් තිබෙන ලෝකයකට එය මොන තරම් විනාශකාරී ද කියන එක පිළිබඳව අපි කාටත් අවබෝධයක් ලබාගත හැකියි,” යනුවෙන් ජනාධිපතිවරයා සඳහන් කළේය.
ශ්රී ලංකාවේ ස්ථාවරය සහ ලෝකයට දෙන පණිවිඩය
මෙම ගැටුමේදී ශ්රී ලංකාව නොසැලී සාමය වෙනුවෙන් පෙනී සිටින බවත්, යුද්ධයට සම්බන්ධ සියලු පාර්ශ්වයන් සාමකාමී ලෝකයක් වෙනුවෙන් අවශ්ය කැපවීම් සහ මඟපෙන්වීම් සිදුකළ යුතු බවත් ශ්රී ලංකාවේ ස්ථාවරය බව ජනාධිපති අනුර කුමාර දිසානායක පැවසීය.
“එනිසා ශ්රී ලංකාව ලෙස අපගේ ස්ථාවරය වන්නේ, මේ යුද්ධයට සම්බන්ධ සියලු පාර්ශ්වයන් ඉතා ඉක්මනින්ම සාමකාමී ලෝකයක් වෙනුවෙන් අවශ්ය කැපවීම්, මඟ පෙන්වීම් කළ යුතු යන්නයි,” යනුවෙන් ඔහු වැඩිදුරටත් පාර්ලිමේන්තුවේදී ප්රකාශ කළේය.
මෙම ප්රකාශය හරහා, ජාත්යන්තර වේදිකාවේදී ශ්රී ලංකාව සාමය සහ රාජ්ය තාන්ත්රික විසඳුම් වෙනුවෙන් පෙනී සිටින රටක් ලෙස සිය ප්රතිරූපය නැවත වරක් තහවුරු කර තිබේ.
