මෑතකදී දැඩි කතාබහට ලක්වූ ත්රිකුණාමලය, ශ්රී සම්බුද්ධ ජයන්ති බෝධිරාජ විහාරයේ ඉදිකිරීම් සම්බන්ධයෙන් මතුව ඇති අර්බුදකාරී තත්ත්වය, එම විහාරස්ථානය සඳහා දැනටමත් පවතින අනුමත සැලැස්මකට අනුව විසඳා ගැනීම වඩාත් සුදුසු බව අභියාචනාධිකරණය අද (20) අවධාරණය කර තිබෙනවා.
විහාරස්ථානයේ කොටසක් අනවසර ඉදිකිරීමක් බව පවසමින් එය කඩා ඉවත් කරන ලෙස වෙරළ සංරක්ෂණ දෙපාර්තමේන්තුව නිකුත් කළ නියෝගය බලරහිත කරන ලෙස ඉල්ලා විහාරාධිපති, පූජ්ය ත්රිකුණාමලයේ කල්යාණ වංශ තිස්ස හිමියන් විසින් ගොනු කළ රිට් පෙත්සමක් විභාගයට ගත් අවස්ථාවේදී අධිකරණය මෙම ප්රකාශය සිදු කළා.
අධිකරණයේදී සිදු වූයේ කුමක්ද?
ධම්මික ගනේපොල සහ ආදිත්ය පටබැඳිගේ යන විනිසුරු මඩුල්ල ඉදිරියේ මෙම පෙත්සම කැඳවනු ලැබුවා.
මෙහිදී පෙත්සම්කාර විහාරාධිපති හිමියන් වෙනුවෙන් පෙනී සිටි ජනාධිපති නීතිඥ සුසන්ත බාලපටබැඳි මහතා අධිකරණයට දන්වා සිටියේ, මීට පෙර පැවති නඩු වාරයේදී දෙපාර්ශ්වයම එකඟතාවකට පැමිණි බවයි. එම එකඟතාව වූයේ, විහාරයේ ප්රශ්නගත ඉදිකිරීම අනුමත සැලැස්මට අනුව වෙනස් කිරීමට විහාරාධිපති හිමියන් කටයුතු කරන අතර, ඒ අනුව වෙරළ සංරක්ෂණ දෙපාර්තමේන්තුව සිය කඩා ඉවත් කිරීමේ නියෝගය ඉවත් කරගැනීමට එකඟ වීමයි.
කෙසේ වෙතත්, මෙම සිද්ධියට අදාළ වෙනත් නඩුවක් සම්බන්ධයෙන් විහාරාධිපති හිමියන්ට රක්ෂිත බන්ධනාගාරගත වීමට සිදුවීම නිසා එකඟතාව ක්රියාත්මක කිරීමට ප්රමාද වූ බව නීතිඥවරයා පැහැදිලි කළා.
අධිකරණයේ තීන්දුව
දෙපාර්ශ්වයේම කරුණු සලකා බැලූ විනිසුරු මඩුල්ල, යම් වෙනස් කිරීමක් සිදු කරන්නේ නම් එය සිදුවිය යුත්තේ අනුමත සැලැස්මට අනුවම බවට අවධාරණය කළා.
ඒ අනුව, එකඟ වූ පරිදි ඉදිකිරීම් වෙනස් කර ගැනීම සඳහා පෙත්සම්කාර පාර්ශ්වයට අප්රේල් මස 28 වන දා දක්වා කාලය ලබා දීමට අධිකරණය තීරණය කළේය. එම දිනයේදී මෙම කටයුතුවල ප්රගතිය අධිකරණයට දැනුම් දෙන ලෙසද පාර්ශ්වයන්ට නියෝග කළා.
