ශ්රී ලංකා පොදුජන පෙරමුණේ හිටපු පාර්ලිමේන්තු මන්ත්රී තිස්ස කුට්ටිආරච්චි සරත් ෆොන්සේකාගේ වර්තමාන දේශපාලන හැසිරීම දැඩි ලෙස විවේචනයට ලක් කර තිබෙනවා. රාජපක්ෂ පරම්පරාව පිළිබඳව ෆොන්සේකා මහතා සිදුකරන ප්රකාශ හුදෙක් පෞද්ගලික වෛරය පිරිමසා ගැනීම සඳහා කරන ඒවා බවත් ඔහු කිසිදු දිනක ජනතාවගේ පොදු ප්රශ්න පිළිබඳව පාර්ලිමේන්තුවේදී හෝ මාධ්ය හමුවේ කතා කර නොමැති බවත් මන්ත්රීවරයා අවධාරණය කළා.
ෆොන්සේකා මහතා පවසන දේවල් ඔහුගේ මට්ටමේ සිටින පිරිසකට විනෝදජනක වුවද, රටේ බුද්ධිමත් ජනතාව ඒවා පිළිකුලෙන් හෙළාදකින බව කුට්ටිආරච්චි සඳහන් කළා. ඔහු වැඩිදුරටත් කියා සිටියේ ෆොන්සේකා මහතාට ගරු කරන්නේ හිටපු සේනාධිනායක මහින්ද රාජපක්ෂ මහතා යටතේ යුද්ධය අවසන් කිරීමට ලබා දුන් සහයෝගය වෙනුවෙන් පමණක් බවයි.
වත්මන් රජයේ ගමන්මග සහ පොරොන්දු
පොදුජන පෙරමුණේ පක්ෂ මූලස්ථානයේ පැවති මාධ්ය හමුවකට එක්වෙමින් මන්ත්රීවරයා අනුර කුමාර දිසානායකගේ රජය පිළිබඳවද කරුණු ගණනාවක් මතු කළා. “76 වසරක සාපය” ගැන පවසමින් දේශපාලඥයන් කෙරෙහි මහජන වෛරයක් ඇති කර බලයට පත් වූ මෙම රජය , මේ දක්වා ජනතාවට දුන් කිසිදු පොරොන්දුවක් ඉටු කර නොමැති බව ඔහු චෝදනා කළා.
විශේෂයෙන්ම වත්මන් රජය යටතේ මෙරටට කිසිදු ආයෝජකයෙකු ගෙන ඒමට හෝ අලුතින් විදුලි බලාගාරයක්, අධිවේගී මාර්ගයක් ඉදිකිරීමට පියවර ගෙන නොමැති බව ඔහු පැවසීය. පසුගිය රජයන් ආරම්භ කළ ව්යාපෘතිවල අඩුපාඩු සෙවීමට පමණක් රජය කාලය වැය කරන බව කුට්ටිආරච්චි මහතාගේ මතයයි.
අධ්යාපන ක්ෂේත්රයේ අර්බුදය සහ වගකීම් විරහිතභාවය
අධ්යාපන ක්ෂේත්රය තුළ මතුව ඇති ගැටලු පිළිබඳවද මෙහිදී අවධානය යොමු විය. විශේෂයෙන්ම 1 වසරේ සහ 6 වසරේ ඉගැන්විය යුතු මොඩියුල පිළිබඳව පවතින අවිනිශ්චිතතාවය හේතුවෙන් ගුරුවරුන් පවා පත්ව සිටින්නේ අසීරුතාවයකට බවත් , ඒ පිළිබඳව පැහැදිලි පිළිතුරක් ලබා දීමට විෂය භාර ඇමතිවරිය හෝ නිලධාරීන් ඉදිරිපත් නොවන බවත් හිටපු මන්ත්රීවරයා සඳහන් කළා.
වර්තමානයේ වැරදි සිදුවන විට නිලධාරීන් මත වගකීම පටවා ඇමතිවරුන් නිහඬව සිටින බවත්, මීට පෙර මෙවැනි තත්වයක් නොතිබූ බවත් ඔහු පෙන්වා දුන්නේය.
ගල් අඟුරු වංචාව සහ කාදිනල්තුමාගේ නිහඬතාවය
මෑතකදී ආන්දෝලනයට තුඩු දුන් ගල් අඟුරු වංචාව පිළිබඳව අදහස් දක්වමින් මන්ත්රීවරයා කියා සිටියේ වංචාව සහ දූෂණය නතර කිරීමට පැමිණි රජය යටතේම මෙවැනි දෑ සිදුවන බවයි.
එමෙන්ම පාස්කු ප්රහාරයේ මහ මොළකරු පිළිබඳව සොයන ලෙස ඉල්ලා සිටි කාදිනල් මැල්කම් රංජිත් හිමිපාණන් දැන් නිහඬව සිටින්නේ මන්දැයි කුට්ටිආරච්චි මහතා ප්රශ්න කළේය. වත්මන් රජයෙන් ඒ පිළිබඳව විමසන ලෙස ඔහු කාදිනල්තුමාට ආරාධනා කළා.
අවසාන වශයෙන්, රජයේ වැරදි මඟ පෙන්වා දීම සඳහා මහා සංඝරත්නය කොළඹට වැඩම කිරීම අගය කරන බවත්, සිංහල බෞද්ධයෙකු ලෙස තමන් උන්වහන්සේලාට ගරු කරන බවත් තිස්ස කුට්ටිආරච්චි මහතා වැඩිදුරටත් කියා සිටියා.
