ඇමරිකාව ඉරානයට පහරදීම තාවකාලිකව නැවැත්වූවත්, ලෝකයේ සහ අපේ රටේ දේශපාලන බල අරගලය ගැන අපට කියන්නට බොහෝ දේ ඇත. බලය අයුතු ලෙස යොදාගැනීමේ ඇත්ත කතාව කියවන්න.
පෙරේදා (23) මුළු ලෝකයටම පුංචි අස්වැසිල්ලක් ලැබුණා. ඒ ඇමරිකානු ජනාධිපති ඩොනල්ඩ් ට්රම්ප්, ඉරානයට එරෙහිව සැලසුම් කර තිබූ ප්රහාරය දින පහකට නතර කරන බව ප්රකාශ කිරීමත් එක්ක. අපේ බත්පතටත් සෘජුවම බලපාන මේ යුද්ධය තාවකාලිකව හෝ නතර වීම ගැන අපි සතුටු වෙන්න ඕනේ. ඒත් මේ සිදුවීම දිහා ටිකක් ගැඹුරින් බලද්දි හිතට එන ප්රශ්න ගොඩයි.
ලෝක බලවතාගේ දෙබිඩි පිළිවෙත
ඇමරිකාව තමන්ව හඳුන්වා ගන්නේ ප්රජාතන්ත්රවාදයේ මුදුන් මල්කඩ විදිහට. හැබැයි කිලෝමීටර් දහස් ගණනක් ඈතින් තියෙන රටකට, කිසිම සාධාරණ හේතුවක් නැතුව පහර දෙන්න හදන එක ප්රජාතන්ත්රවාදයත් එක්ක ගළපගන්නේ කොහොමද? මැදපෙරදිග ගැටුම් දිග්ගැස්සුණොත් ලෝක ආර්ථිකයට වෙන හානිය ගැන අමුතුවෙන් කියන්න ඕන නෑ. ඇමරිකාවේ සහ ඊශ්රායලයේ පෞද්ගලික කෝන්තර පිරිමහගන්න මුළු ලෝකෙම වන්දි ගෙවන්න වෙනවා. පුදුමෙ කියන්නේ ඇමරිකාවේ මිත්ර රටවල් පවා මේ වෙලාවේ කට වහගෙන ඉන්න එක. මේකෙන් පේන්නේ ලෝකයේ රජ කරන්නේ ‘හරි හෝ වැරදි’ නෙවෙයි, ‘බලවතාගේ වුවමනාව’ කියන එකයි.
අපේ රටේ අතීත පාඩම්
මේ බලය අයුතු ලෙස යොදාගැනීම ගැන කතා කරන්න ඇමරිකාවටම යන්න ඕන නෑ. අපේ රටේ ඉතිහාසය දිහා බැලුවත් ඕන තරම් උදාහරණ තියෙනවා.
* එල්ටීටීඊය තමන් දෙමළ ජනතාවගේ එකම නියෝජිතයා ලෙස පෙනී සිටීම සහ ජාත්යන්තරය එය පිළිගැනීම.
* 1987 වඩමාරච්චි මෙහෙයුම නවත්වන්න කලාපීය බලවතා (ඉන්දියාව) මැදිහත් වීම සහ බලහත්කාරයෙන් පළාත් සභා ක්රමය පැටවීම.
* 1970-77 සිරිමාවෝ බණ්ඩාරනායක ආණ්ඩුව බලය අවුරුදු දෙකකින් දිගු කරගැනීම.
* ජේ.ආර්. ජයවර්ධන මහතා 1982 මැතිවරණය වෙනුවට ජනමත විචාරණයක් පැවැත්වීම.
මේ හැම අවස්ථාවකම සිද්ධ වුණේ ප්රජාතන්ත්රවාදය වෙනුවට බලවාදය රජ කිරීමයි.
හැත්තෑ හය අවුරුදු සාපය සහ වත්මන් යථාර්ථය
ජාතික ජන බලවේගය නිතරම කියන හැත්තෑ හය අවුරුදු සාපය තුළ අපේ පාලකයෝ හැසිරුණේ මේ රටේ සින්නක්කර අයිතිකාරයෝ වගේ. ජනතාව දුන්න බලය ඔවුන් තමන්ගේ වාසියට පාවිච්චි කළා. ඒ නිසාම මිනිස්සු මේ ක්රමය වෙනස් කරන්න අලුත් නායකත්වයක් හෙව්වා.
හැබැයි ප්රශ්නය තියෙන්නේ එතනයි. අලුතින් බලයට ආපු අයත් පහුගිය අවුරුදු එකහමාර ඇතුළත පෙන්නුම් කරන්නේ මොකක්ද? බලය ලැබුණම කවුරුත් එකයි කියන එකද? බාල ගල් අඟුරු ගෙන්වීමේ සිද්ධියට චෝදනා එල්ල වුණු ඇමතිවරයෙක්ව, නිර්දෝෂී බව ඔප්පු වෙනකන්වත් තනතුරෙන් ඉවත් නොකර තියාගැනීම ගැන ඔබ හිතන්නේ මොකක්ද? විධායක බලය සහ පාර්ලිමේන්තුවේ තුනෙන් දෙකේ බලය අයුතු ලෙස පාවිච්චි කිරීමක් නෙවෙයිද මේ?
නිගමනය
අන්තිමට බලද්දි පේන්නේ ඇමරිකන් ජනාධිපති ඉඳන් අපේ රටේ පුංචිම දේශපාලකයා දක්වාම, තමන්ගේ තරමේ හැටියට බලය අයුතු ලෙස පාවිච්චි කරන බවයි. කුටුම්බයේ ඉඳන් ජාත්යන්තරය දක්වාම රජ කරන්නේ අපි අදහන ප්රජාතන්ත්රවාදය නෙවෙයි, බලවාදයයි. මේ තිත්ත ඇත්ත අපි තේරුම් ගන්න ඕනේ.
