එදා සජිත්ට “පෑඩ් මෑන්” කියා සිනාසුණු අය අද එම යෝජනාවම ක්රියාත්මක කරයි.
වසර කිහිපයකට පෙර මෙරට දේශපාලන වේදිකාවේ දැඩි කතාබහට සහ ඇතැම් පිරිස්වල හාස්යයට ලක්වූ “පාසල් සිසුවියන්ට නොමිලේ සනීපාරක්ෂක තුවා ලබා දීමේ” යෝජනාව, වත්මන් රජය යටතේ යථාර්ථයක් බවට පත්ව තිබෙනවා.
වත්මන් ආණ්ඩුව විසින් ගෙන ඇති කැබිනට් තීරණයකට අනුව, රජයේ පාසල්වල 6 ශ්රේණියෙන් ඉහළ ඉගෙනුම ලබන සිසුවියන්, පිරිවෙන් සහ විශේෂ පාසල්වල සිසුවියන් ලක්ෂ 10කට අධික පිරිසක් සඳහා සනීපාරක්ෂක තුවා මිලදී ගැනීමට වවුචර් පත් (Gift Vouchers) ලබා දීමට කටයුතු යොදා ඇත.
ලැබෙන ප්රතිලාභය
මෙම වැඩසටහන යටතේ එක් සිසුවියකට රුපියල් 1,440/- ක වටිනාකමකින් යුත් තිළිණ පත් දෙකක් ලැබෙනු ඇත. මෙම වවුචර් පත් භාවිතයෙන් දේශීය වෙළඳපොළේ ඇති රු. 120 බැගින් වූ පැකට් 12ක් හෝ රු. 180 බැගින් වූ පැකට් 08ක් මිලදී ගැනීමේ හැකියාව සිසුවියන්ට හිමිවේ. ආර්ථික දුෂ්කරතා මැද අධ්යාපනය ලබන දියණියන්ගේ සෞඛ්යාරක්ෂාව සහ අභිමානය රැකීම උදෙසා මෙය ඉතා ප්රගතිශීලී පියවරකි.
සජිත්ගේ “පෑඩ් මෑන්” කතාව සහ දෛවයේ සරදම
මෙම පුවතත් සමඟ දේශපාලන ක්ෂේත්රයේ පැරණි සිදුවීමක් නැවත කරළියට පැමිණ තිබේ. 2019 ජනාධිපතිවරණ සමයේදී විපක්ෂ නායක සජිත් ප්රේමදාස මහතා ප්රථම වරට මෙම යෝජනාව ඉදිරිපත් කළේය. මෙරට කාන්තාවන් මුහුණ දෙන “Period Poverty” (ආර්තව දරිද්රතාවය) පිටුදැකීම සඳහා පාසල් දියණියන්ට නොමිලේ සනීපාරක්ෂක තුවා ලබා දිය යුතු බව ඔහු පවසා සිටියේය.
එම අවස්ථාවේදී වත්මන් පාලක පක්ෂයට සම්බන්ධ පාර්ශවයන් මෙන්ම සමාජ මාධ්ය ක්රියාකාරීන් රැසක් සජිත් ප්රේමදාස මහතාට “පෑඩ් මෑන්” (Pad Man) යනුවෙන් අන්වර්ථ නාමයක් පටබඳිමින් එම යෝජනාව දැඩි ලෙස හාස්යයට හා උපහාසයට ලක් කළහ. මෙය ප්රායෝගික නොවන විහිළුවක් ලෙස එදා හුවා දැක්වූවද, වසර කිහිපයකට පසු එම ප්රතිවාදී කඳවුරේ ආණ්ඩුවක් යටතේම එම යෝජනාව ක්රියාත්මක කිරීමට සිදුවීම දෛවයේ සරදමක් බව දේශපාලන විචාරකයෝ පවසති.
කෙසේ වෙතත්, යෝජනාව කවුරුන් කළද, ප්රමාද වී හෝ මෙවන් අත්යවශ්ය පියවරක් ක්රියාත්මක වීම මෙරට පාසල් දියණියන් ලැබූ ජයග්රහණයක් බව නොකියාම බැරිය.
