QR ඉන්ධන කෝටාව රාජකාරියට ප්රමාණවත් නැහැ. අමතර ඉන්ධන ඉල්ලා සෞඛ්ය වෘත්තිකයෝ සෞඛ්ය ඇමතිට සහ ලේකම්ට ලිපියක් යවති.
රට පුරා ක්රියාත්මක QR කේතය මත පදනම් වූ ඉන්ධන සීමා කිරීමේ ක්රමවේදය, රටේ සෞඛ්ය සේවාවේ අඛණ්ඩ පැවැත්මට බරපතල තර්ජනයක් එල්ල කරමින් පවතින බවට වෛද්ය වෘත්තීයවේදීන්ගේ එකාබද්ධ බලමණ්ඩලය අනතුරු අඟවයි. සෞඛ්ය කාර්ය මණ්ඩල මුහුණ දෙන මෙම ගැටලු සම්බන්ධයෙන් වහාම පියවර ගන්නා ලෙස ඉල්ලා එම සංගමය සෞඛ්ය අමාත්ය වෛද්ය නලින්ද ජයතිස්ස සහ සෞඛ්ය ලේකම් වෛද්ය අනිල් ජාසිංහ වෙත ලිපියක් යොමු කර තිබේ.
පරිපූරක වෛද්ය වෘත්තීයවේදීන්ගේ එකාබද්ධ බලමණ්ඩලයේ සභාපති රවි කුමුදේශ් මහතාගේ අත්සනින් යොමු කළ මෙම ලිපිය මගින් ඔවුන් අවධාරණය කරන්නේ, අත්යවශ්ය සේවාවක් ලෙස නොනවත්වා පවත්වාගෙන යා යුතු සෞඛ්ය සේවාවට අදාළව, රජය සුවිශේෂී සැලකිල්ලක් නොදැක්වීම කණගාටුවට කරුණක් බවයි.
“සාමාන්ය පුරවැසියෙක් සේ සැලකීම අසාධාරණයි”
මෙම ලිපිය මගින් පෙන්වා දෙන ප්රධානතම ගැටලුව වන්නේ, දිවා රෑ නොබලා සේවයේ නියුතු, දිගු දුර ගමන් කිරීමට සහ හදිසි කැඳවීම් සඳහා ඕනෑම මොහොතක සූදානමින් සිටිය යුතු සෞඛ්ය කාර්ය මණ්ඩලයට, සාමාන්ය පුරවැසියෙකුට ලබාදෙන ඉන්ධන කෝටාවම ලබා දීමයි. එය ඔවුන්ගේ රාජකාරිමය අවශ්යතා කිසිසේත්ම සලකා නොගත් අසාධාරණ ප්රතිපත්තියක් බව එම සංගමය පෙන්වා දෙයි.
මෙම සීමාසහිත ඉන්ධන ප්රමාණය යටතේ තම රාජකාරි ඉටුකිරීම මේ වන විට බරපතල අපහසුතාවයක් බවට පත්ව ඇති බව ඔවුන් වැඩිදුරටත් සඳහන් කරයි.
පෝලිමේ නාස්ති වන කාලය සහ රෝගීන්ගේ ජීවිත
රට පුරා පවතින දිගු ඉන්ධන පෝලිම් හේතුවෙන්, රෝගීන් වෙනුවෙන් කැප කළ යුතු වටිනා කාලය ඉන්ධන ලබාගැනීම සඳහා වැය කිරීමට සෞඛ්ය කාර්ය මණ්ඩලයට සිදුව තිබේ. මෙය සෘජුවම සෞඛ්ය සේවාවේ ගුණාත්මක භාවයට සහ අඛණ්ඩතාවයට බලපාන බව වෘත්තීය සමිති අවධාරණය කරයි.
මීට අමතරව, අනෙකුත් රාජ්ය සේවකයන්ට බදාදා දිනය නිවාඩු දිනයක් ලෙස ලබා දී තිබියදී, සෞඛ්ය කාර්ය මණ්ඩලයට එම නිවාඩුව හිමි නොවේ. එසේ අනිවාර්යයෙන් සේවයට වාර්තා කරන ඔවුන්ගේ අවශ්යතා, නිවසේ සිටින රාජ්ය සේවකයෙකුගේ අවශ්යතා සමග සාමාන්යකරණය කිරීම බලවත් අසාධාරණයක් බවද එම ලිපියේ සඳහන් වේ.
ඉදිරිපත් කර ඇති ප්රධාන ඉල්ලීම් තුන
මෙම තත්ත්වය සැලකිල්ලට ගනිමින්, පහත සඳහන් ඉල්ලීම් සම්බන්ධයෙන් වහාම ක්රියාමාර්ග ගන්නා ලෙස වෘත්තීය සමිති රජයෙන් ඉල්ලා සිටී.
1. අමතර ඉන්ධන කෝටාවක් ලබා දීම – සෞඛ්ය කාර්ය මණ්ඩලයේ රාජකාරිමය අවශ්යතා සලකා බලා ඔවුන්ට විශේෂිත වූ අමතර ඉන්ධන කෝටාවක් ලබා දීම.
2. ප්රමුඛතා ක්රමවේදයක් හඳුන්වා දීම – දිගු පෝලිම්වල නොසිට, ප්රමුඛතාවය මත ඉන්ධන ලබා ගැනීමට හැකි වන පරිදි විශේෂ ක්රමවේදයක් සකස් කිරීම.
3. නිවාඩු දින දීමනාවක් ලබා දීම – අනෙකුත් රාජ්ය සේවකයන්ට නිවාඩු ලබා දී ඇති දිනවල සේවයට වාර්තා කරන සෞඛ්ය කාර්ය මණ්ඩලය සඳහා විශේෂ නිවාඩු දින දීමනාවක් අනුමත කිරීම.
මේ සම්බන්ධයෙන් මෙතෙක් කිසිදු නිල සාකච්ඡාවක් ලබා නොදීම බරපතල නොසලකා හැරීමක් බව පෙන්වා දෙන රවි කුමුදේශ් මහතා, මෙම ගැටලු සාකච්ඡා කිරීම සඳහා කඩිනම් අවස්ථාවක් ලබා දෙන ලෙසද ඉල්ලා තිබේ. සෞඛ්ය බලධාරීන් මෙම ඉල්ලීම් වලට කෙසේ ප්රතිචාර දක්වනු ඇත්දැයි Seylan News අවධානයෙන් පසුවෙයි.
