දේශීය ගෙවීම් වලට විදේශ මුදල් භාවිතය සිර දඬුවම් ලැබිය හැකි වරදක් – මහ බැංකුවේ නව නීතිය සහ එහි බරපතළ ප්රතිවිපාක මෙන්න.
ශ්රී ලංකා මහ බැංකුව රටේ සියලුම ජනතාවට සහ ව්යාපාරිකයන්ට බලපාන ඉතා වැදගත් නිවේදනයක් නිකුත් කර තිබෙනවා. ඒ අනුව, ශ්රී ලංකාව තුළ භාණ්ඩ හෝ සේවා මිලදී ගැනීමේදී විදේශ මුදල් (ඩොලර්, යුරෝ වැනි) භාවිත කිරීම දඬුවම් ලැබිය හැකි වරදක් බව මහ බැංකුව තරයේ අවධාරණය කරනවා.
මෑතකදී, මෙරට නේවාසික පුද්ගලයන් අතර සිදුවන ගනුදෙනු සඳහා ශ්රී ලංකා රුපියල් වෙනුවට විදේශ මුදල් භාවිත කරන අවස්ථා කිහිපයක් පිළිබඳව මහ බැංකුවේ අවධානය යොමු වී තිබෙනවා.
නීතිය පැහැදිලියි – ගනුදෙනු රුපියල් වලින් පමණයි
2023 අංක 16 දරන ශ්රී ලංකා මහ බැංකු පනතට සහ 2017 අංක 12 දරන විදේශ විනිමය පනතට අනුව, ශ්රී ලංකාව තුළ නේවාසිකයන් අතර සිදුවන සියලුම ගනුදෙනු ශ්රී ලංකා රුපියල්වලින් පමණක් සිදු කළ යුතුයි.
මහ බැංකුව විසින් ලබාදුන් විශේෂ අවසරයක් ඇති අවස්ථාවකදී හැර, කිසිදු පුද්ගලයෙකුට හෝ ව්යාපාරයකට දේශීය ගනුදෙනුවක් සඳහා විදේශ මුදලකින් ගෙවීමක් කිරීමට හෝ ගෙවීමක් භාරගැනීමට අවසර නැහැ.
කාඩ්පත් සහ Online ගෙවීම් වලටත් මේක අදාළද?
ඔව්. මෙම නීතිය කාඩ්පත් ගෙවීම් සඳහා ද එකසේ වලංගු වෙනවා.
යම් වෙළෙඳ ආයතනයක්, මෙරට නේවාසිකයෙකුගෙන් හර හෝ බැර කාඩ්පත් (Debit/Credit Cards) හරහා ගෙවීමක් ලබා ගැනීමේදී, එම මුදල විදේශ විනිමය ගිණුමකට බැර කරවා ගැනීමට උත්සාහ කිරීම ද වරදක්. සරලවම කිවහොත්, ඔබ ශ්රී ලංකාවේ වෙළෙඳසැලකින් යමක් මිලදී ගන්නේ නම්, එම ගෙවීම රුපියල් වලින්ම සිදුවිය යුතුයි.
නීතිය කැඩුවොත් මුහුණ දෙන්න වෙන දඬුවම්
මෙම නීතිය උල්ලංඝනය කිරීම සුළුවෙන් තැකිය යුතු දෙයක් නොවෙයි. එසේ කරන පුද්ගලයන්ට හෝ ආයතනවලට එරෙහිව දැඩි නීතිමය ක්රියාමාර්ග ගැනීමට මහ බැංකුවට බලය තිබෙනවා. වරදකරුවෙකු වුවහොත්, මහේස්ත්රාත් අධිකරණයක් මගින් පහත දඬුවම් නියම කළ හැකියි.
* රුපියල් මිලියන 25ක් දක්වා වූ දඩයක් හෝ
* වසර 3ක් දක්වා (බරපතළ හෝ ලිහිල්) සිර දඬුවමක් හෝ
* මෙම දඬුවම් දෙකම
මේ නිසා, දැඩි නීතිමය ප්රතිවිපාකවලට මුහුණ දීම වළක්වා ගැනීම සඳහා, මෙම නීතිමය අවශ්යතාවලට “දැඩි ලෙස” අනුගත වන ලෙස මහ බැංකුව සියලුම ශ්රී ලාංකිකයන්ගෙන් සහ ව්යාපාරික ප්රජාවෙන් ඉල්ලා සිටිනවා.
