රටේ ප්රධාන ආර්ථික මධ්යස්ථාන පහක් සඳහා නව පාලන සමාගමක් හඳුන්වා දීමට ගත් තීරණයක් සම්බන්ධයෙන් දැනුවත් කිරීමට දඹුල්ල ආර්ථික මධ්යස්ථානයේ පැවති සාකච්ඡාවක් උණුසුම් මුහුණුවරක් ගෙන තිබෙනවා. විෂය භාර අමාත්ය වසන්ත සමරසිංහ මහතා සහ ආර්ථික මධ්යස්ථානවල ව්යාපාරික ප්රජාව අතර ඇතිවූ මෙම සාකච්ඡාව අවසානයේ ව්යාපාරිකයන්ගේ දැඩි විරෝධය හමුවේ ඇමතිවරයාට පසුබැසීමට සිදු වුණා.
ඇමතිවරයාගේ පැහැදිලි කිරීම
මෙම සාකච්ඡාවේදී අමාත්ය වසන්ත සමරසිංහ පෙන්වා දුන්නේ දඹුල්ල, නුවරඑළිය, තඹුත්තේගම, කැප්පෙටිපොළ, සහ නාරාහේන්පිට යන ආර්ථික මධ්යස්ථාන කළමනාකාර භාරයකින් පාලනය වන තත්ත්වයෙන් මුදවා, අලුතින් ස්ථාපිත කරන ලද රජයේ සමාගමක් යටතට පත් කරන බවයි.
“මෙම සමාගම පිහිටුවීමේ ප්රධාන අරමුණ වන්නේ මෙම ආර්ථික මධ්යස්ථාන නිසි පරිපාලනයකට ලක්කර, ගොවියාටත් පාරිභෝගිකයාටත් සාධාරණයක් ඉටුවන වෙළෙඳපොළක් නිර්මාණය කිරීමයි,” යනුවෙන් අමාත්යවරයා සඳහන් කළා.
මෙම නව සමාගම යටතේ මාසික බදු මුදල් එකතු කිරීම ඇතුළු සියලු පරිපාලන කටයුතු සිදුවන බවත්, සියලු ගෙවීම් එම සමාගමට කළ යුතු බවත් ඔහු වැඩිදුරටත් පැවසීය. මෙය රජයට අයත් සමාගමක් නිසා ගොවීන්ගේ හෝ ව්යාපාරිකයන්ගේ අයිතීන්ට කිසිදු බලපෑමක් සිදු නොවන බවටද අමාත්යවරයා සහතික වුණා.
ව්යාපාරිකයන්ගේ දැඩි විරෝධය
කෙසේ වෙතත්, අමාත්යවරයාගේ මෙම ප්රකාශයත් සමඟම රැස්ව සිටි ව්යාපාරික ප්රජාවගෙන් දැඩි විරෝධයක් එල්ල විය. ඔවුන්ගේ ප්රධාන චෝදනාව වූයේ මෙවැනි තීරණයක් ගැනීමට පෙර තමන්ව කිසිසේත් දැනුවත් නොකිරීමයි.
“කිසිම ලිඛිත ගිවිසුමක්, ලියවිල්ලක් නැතුව, ඇමතිතුමාට ඕන කට්ටියක් දාලා හදන සමාගමකට අපේ ව්යාපාර පාලනය කරන්න දෙන්න බෑ. මේක කරන විදිහ ගැන කිසිම පැහැදිලි කිරීමක් නෑ. එකපාරටම ඇවිත් නීති දාන්න බෑ,” යනුවෙන් ව්යාපාරිකයෙක් හඬ නැගුවා.
මෙම ක්රියාවලියේ විනිවිදභාවයක් නොමැති බවත්, අමාත්යවරයාට හිතවත් පිරිසක් සමාගමට පත්කර ව්යාපාරික කටයුතු තම අභිමතය පරිදි පාලනය කිරීමට උත්සාහ දරන බවටත් ඔවුහු චෝදනා කළා.
උණුසුම් තත්ත්වය සහ ඉදිරි පියවර
ව්යාපාරිකයන්ගෙන් එල්ල වූ දැඩි සහ නොනවතින විරෝධය හමුවේ, අමාත්ය වසන්ත සමරසිංහ මහතාට සිය ස්ථාවරයෙන් තාවකාලිකව ඉවත් වීමටයි සිදුව ඇත්තේ.
අවසානයේදී ඔහු සඳහන් කළේ මෙම නව සමාගම සහ එහි ක්රියාකාරීත්වය පිළිබඳව ව්යාපාරික ප්රජාව සමග තවදුරටත් සාකච්ඡා කර, දෙපාර්ශවයටම එකඟ විය හැකි ගිවිසුමක් සකස් කිරීම සඳහා ලබන සතියේ නැවත දිනයක් ලබා දෙන බවයි. ඒ අනුව, ආර්ථික මධ්යස්ථානවල අනාගතය පිළිබඳ අවසන් තීරණය ඉදිරි සතියේදී පැවැත්වෙන සාකච්ඡාවෙන් අනතුරුව ගැනීමට නියමිතයි.
